Қаланы абаттандыру және санитарлық тазарту айлығы аясында 2018 жылғы 27 сәуір күні Павлодар қаласы  білім беру бөлімінің Экология және турзим орталығының ұстаздары мен түлектері, қаланың 4, 14, 24, 29, 30 ЖОМ оқушылары «Спецмашин» ЖШС-мен бірлесе отырып Гагарин атындағы мәдениет және демалыс саябағының аумағын тазартуға шықты. Шара оқушыларды қалалық саябақтың аумағын санитарлық тазарту жөніндегі шараға тартып, оған белсенді түрде қатысу мақсатында жүзеге асырылды.

Жұмыс басталардың алдында оқушыларға саябаққа қатысты жалпы  мәлімет берілді, саябақта мәдениетті түрде демалу және қауіпсіздік ережелері туралы айтылды.

Қолдарына қажетті құрал-сайман алған  оқушылар саябақ аумағында бір кісідей жұмысқа кірісті, олар қоқыс жинап, аумақты былтырғы жапырақтар мен шөптен тазартты, үйілген бұтақтарды реттеді. Оқушылардың игілікті ісінің арқасында бірнеше сағат ішінде саябақтың аумағы жаңарып, айнала тазарып, көркейе түсті.

Экология және туризм орталығының басшысы Салават Ботбайұлы Сейітқанов аталмыш шараның өздерінің еңбек десантының екінші кезеңі екенін, сондай-ақ «Спецмашин» ЖШС-мен үйлесімді жұмысқа қол жеткізілгенін атап өтті. Басшы ұйым демеуші ретінде  шараға қатысушыларды тәтті сыйлықтармен және  грамоталармен марапаттауды ұмытпайтынын айтты.

Еңбек десанты - саябақ аумағын тазарту жөніндегі шара ғана емес, сонымен бірге оқушылар мен ұстаздар ұжымының ұйымшылығын  арттыру жолындағы тамаша мүмкіндік.