Наурыз мейрамы! Ұлттық жаңғыру мектебінде, Наурыз мерекесін қонақтар мен көрермендер көктемнің келуін білдіретін ұлттық тағамдардан дәм татудан бастады. Бұл мерекенің басты тағамы мәдени – орталық бөлімшесінің әжелері дайындаған наурыз көже ерекше болды. Мереке Достық үйінің мәжіліс залында ұлттық бөлімше оқушыларының концерттік бағдарламасымен жалғасты. Ұлттық бөлімшенің оқушылары өз халықтарының салт-дәстүр ерекшеліктерін би, ән арқылы көрсетті. Міне, мерекелік керней дауысы естілді. Мерекені Қыдыр-Ата ашты. Сахнаға ертегі кейіпкерлері: Көктем қызы (мәдени орталығы), Бахар қызы (әзірбайжан бөлімшесі), Нәурыз бикә (татар бөлімшесі), Бьасте (шешен-ингуш бөлімшесі), Джаз кьызчыкь (кабардин-балқар бөлімшесі) шықты. Аталған бөлімшелердің оқушылары өз халқының көктемді қарсы алу ерекшелігін көрсетті. Олар қол ұстасып алауды айнала достық биін биледі. Сонымен қатар әзілқой фольклорлық кейіпкерлер: Шурале (татар-башқұт халқы), Қоса (әзірбайжан халқы), Забырш (шешен-ингуш халқы) өз өнерлерін көрсетті. Мерекенің шарықтау шегі халықтар бірлігін білдіретін «Наурыз-Думан» әнінің орындалуы болды. Көрермендердің эмоционалдық көңіл-күйі, достық қарым-қатынасы мерекені ажарлата түсті.