2026 жылғы 9 қыркүйекте Павлодар қаласының Балалар көркемсурет мектебінде Отбасы күніне арналған «Отбасы – өмірдің бастауы» атты суреттер көрмесінің салтанатты ашылуы өтті. Мерекелік шараға мектеп тәрбиеленушілері мен педагогтері, ата-аналар, сондай-ақ қалалық Ардагерлер кеңесінің өкілдері қатысты.

Іс-шараның құрметті қонақтары қатарында 4-шағын аудан Ардагерлер кеңесінің мүшесі, белсендісі Кусаинова Мәкен Мырзабековна, кеңес төрағасының орынбасары Клюйкова Ирина Валентиновна, 4-шағын аудан Ардагерлер кеңесінің төрайымы Ельтаева Гульнар Рашатбековна және мектептің үлкен досы, оның құрылуының бастауында тұрған Қазақстан Республикасының білім беру ісінің үздігі, Қазақстан Республикасы Көркемөнер академиясының корреспондент-мүшесі Такирбасов Ерсын Каскиевич болды.

Шараның басты мақсаты – отбасындағы шығармашылық дамудың маңызын, оның баланың тұлға ретінде қалыптасуына және елінің болашақ азаматы болып тәрбиеленуіне ықпалын көрсету. Көрме аясында №34 жалпы орта білім беретін мектеп оқушыларына, «Жігер» ДПК тәрбиеленушілеріне, Балалар көркемсурет мектебінің оқушылары мен олардың ата-аналарына «Күзгі композиция» тақырыбында шеберлік сағаты ұйымдастырылды. Шеберлік сағатын мектеп педагогі А.А. Мергалиева өткізді. Көрменің салтанатты ашылуында ата-аналар Татьяна Федоровна Ибрагимова мен Александра Станиславовна Ловина-Самошкина сөз сөйлеп, отбасылық тәрбиедегі шығармашылық дамудың маңызы туралы өз ойларын ортаға салды. Ал «Жігер» ДПК тәрбиеленушілері – «Дарын» триосы мен Рашит Аиша музыкалық шығармаларын орындап, шара қонақтарына көтеріңкі көңіл күй сыйлады. Көрме экспозициясына көркемсурет мектебі оқушыларының 16 шығармасы қойылды. Бұл – жай ғана балалардың салған суреттері емес. Әр жұмыстан баланың қоршаған әлемге өзіндік көзқарасын, көңіл күйін және шығармашылық ізденісін байқауға болады.

Көрме қонақтарға балалар шығармашылығының нәтижелерімен танысуға мүмкіндік беріп қана қоймай, бала үшін сүйікті ісімен айналысуға мүмкіндік жасаудың және ата-ана қолдауының қаншалықты маңызды екенін көрсетеді. Өйткені баланың қызығушылығына көңіл бөлу, оның шығармашылық қабілетін қолдау – отбасылық тәрбиенің маңызды бөлігі.