2018 жылғы 13 маусымда Құрманғазы атындағы №1 балалар музыка мектебінде мектеп бітірушілер кеші өтті.
6 мамандық бойынша (жеке орындау, орыс халық аспаптары, фортепиано, қазақ халық аспаптары, шекті, үрмелі және соқпалы аспаптар) бітірушілер саны 56 оқушыны құрады. Бітірушілер қатарында 2018 жылғы «Территория музыки - без границ» ІХ халықаралық фестиваль-конкурсының лауреаты Бакытова Айшат, Қаратай Нұрбол, Айдос Аубакиров (І орын), Тамила Исамбаева (ІІ орын), Арай Сактасынова (ІІІ орын), «Mega talents competition» халықаралық фестиваль-конкурсының лауреаты Азамат Капсалыков (І орын), «Uni star vokal жобасының финалисі Роман Новосельцев.
Кеш шар мен гүлге, шаттық көңіл-күйге толы болды, «Мектеп вальсі» шырқалды. Ұл балалар классикалық костюмде болса, қыздар бүрмелі көйлектерін киіп, мектепте өткізген жылдарын анық көрсететін қабырға газеттеріне көз жүгіртті.
Мерекелік кеш салтанатты құттықтаумен бастау алды. Мектептің дәстүрі бойынша әр оқушы өзінің әртістік және би өнерлерімен ерекшеленген, әзілге толы іс-шара өткізілді.
Білім алу жылдары ішінде балалар музыканы барынша түсініп, сезініп, оның рухани құндылығын бағалай білуді үйренді. Бітірушілердің көбі өз таңдауын жасап, алдағы уақытта музыкалық білімін жетілдіруді одан әрі жалғастыруды жөн санайды.