11 маусым күні «Оқуға құштар мектеп» жобасы аясында мектеп жанындағы лагерь тәрбиеленушілеріне арналған «Шабыт сыйлайтын кітап» атты іс-шара өтті. Іс-шараға 140 бала қатысты. Кездесудің басты мақсаты – каникул уақытында танымдық оқуға деген қызығушылықты арттыру, оқырмандық мәдениетті қалыптастыру және оқушылардың дүниетанымын кеңейту болды. Іс-шараның құрметті қонақтары ретінде білім бөлімінің өкілдері қатысты. Олар өскелең ұрпақтың жан-жақты дамуы үшін кітап оқудың маңыздылығын атап өтті.

 

Іс-шара TEDx форматында ұйымдастырылды, бұл әрбір қатысушыға өзін нағыз спикер ретінде сезінуге мүмкіндік берді. Оқушылар өздерінің сүйікті көркем шығармалары туралы әңгімелеп, көпшілік алдында сөз сөйледі. Олар оқыған кітаптарынан алған әсерлерімен бөлісіп, қызықты сюжеттер мен кейіпкерлерді таныстырды. Өз баяндамаларында оқушылар бұл шығармаларды құрдастарына не үшін оқуға ұсынатынын түсіндірді. Әр қатысушы тыңдаушылардың қызығушылығын оятып, кітап оқудың тартымды әрі шабыттандыратын іс екенін көрсетуге тырысты.

 

Іс-шара соңында балалар жаңа авторлармен танысып, жазғы демалыс кезінде көбірек шығарма оқу мақсатында өзара көркем әдебиет кітаптарымен алмасты. Бұл бастама қатысушылардың ерекше қызығушылығын тудырып, оқушылар арасында кітап оқуды насихаттауға ықпал етті. «Шабыт сыйлайтын кітап» іс-шарасы мазмұнды өтіп, «Оқуға құштар мектеп» жобасы аясындағы маңызды кездесулердің біріне айналды.