23 сәуірде «Үлкен үзіліс – 2025» атты жарқын әрі ауқымды қалалық байқаудың финалы өтті.

Мұхтар Әуезов атындағы мектептің оқушылары бүкіл оқу жылы бойы аталмыш байқауға қатысып, кезеңдерінен лайықты өтіп, финалға жолдама алды.

Мектептің оқушылары финалда мектептің домбыра оркестрінің жас музыканттарымен музыкалық композициялар орындады, ал ұлттық аспаптың сүйемелдеуімен шырқалған Абайдың әні көрермендердің жүрегін тебірентпей қоймады.

Ерекше әсер қалдырған сәттердің бірі — «Трио» форматындағы өнер көрсету болды: оқушы, ата-ана және мұғалім бірге орындаған «Туған жер» әні ұрпақтар бірлігі мен сабақтастығының шынайы символына айналды.

Анасы мен қызының орындауындағы «Мама» әнінің сүйемелдеуімен орындалған оқушылар вальсі көрермендерге ұмытылмас әсер қалдырып, зор эмоция туғызды.

Сондай-ақ ұлттық «Қамажай» биі, Абай, Шәкәрім, Мұқағали және Жұбан Молдағалиев шығармаларын мәнерлеп оқу, заманауи би және баланың өміріндегі ананың рөлін бейнелейтін көлеңкелер театры сүйемелдеуімен қойылған монолог қатысушылардың талантын және шығармашылық қабілеттерін паш етті.

Біздің мектептің шығармашылық ұжымы дайындаған бағдарлама хор орындауымен аяқталып, барлық байқау қатысушыларын біріктірді.

Алда – байқаудың қорытындысын шығару. Оқушыларымызға сәттілік тілейміз!