1 қыркүйек күні Мұхтар Әуезов атындағы мектебімізде Білім күніне арналған салтанатты жиын өтті. Биылғы мерекенің басты ұраны – «Мектебім – мейірімді мекені».

Бұл ерекше күн оқушылар, ұстаздар мен ата-аналар үшін шын мәнінде шынайы қуаныш пен толқу сыйлады. Әсіресе мектеп табалдырығын алғаш рет аттаған бүлдіршіндеріміз үшін бұл күн ұмытылмас сәтке айналды. Олар жоғары сынып оқушылары мен ұстаздар тарапынан ыстық ықыласпен, жүрекжарды тілектермен қарсы алынды.

Мерекелік іс-шара мазмұнды өнер бағдарламасымен жалғасты. Оқушылар Отан, мектеп және ұстаз туралы өлеңдер оқып, әндер шырқап, сахналық қойылымдар көрсетті. Дәстүр бойынша алғашқы қоңырау соғылып, жаңа оқу жылының басталғанын паш етті.

«Мектебім – мейірімді мекені» ұраны мектептің тек білім ордасы ғана емес, сонымен қатар өзара құрмет, жылулық, сенім мен ізгілік салтанат құрған екінші үй екенін білдіреді. Біз осындай орта қалыптастыруды мақсат тұтамыз.

Жаңа оқу жылы баршаңызға табысты, қызықты әрі шабытқа толы болсын!